Comóradh Idirnáisiúnta
3ú Samhain 2019
Phoenix,
Arizona

 

Tharla Comóradh Idirnáisiúnta an Ghorta Mhóir 2019 in Phoenix, Arizona ar Dé Domhnaigh, 3ú Samhain.

Agus na socruithe le haghaidh an Chomórtha Idirnáisiúnta á ndeimhniú aici, dúirt Josepha Madigan T.D., an tAire Cultúir, Oidhreachta agus na Gaeltachta agus Cathaoirleach Choiste Chomóradh Náisiúnta an Ghorta Mhóir:

‘Mar Chathaoirleach Choiste Chomóradh Náisiúnta an Ghorta Mhóir, tá mé ag súil go mór le reáchtáil Chomóradh Idirnáisiúnta an Ghorta Mhóir in Phoenix, Arizona. Is é seo an cúigiú uair a reáchtálfar an comóradh sna Stáit Aontaithe agus is é Phoenix an t-ionad is faide siar go dtí seo. Roimhe seo, reáchtáladh Comóradh Idirnáisiúnta an Ghorta Mhóir i Nua-Eabhrac, Bostún, New Orleans agus Philadelphia.

Is cúis áthais ar leith dom go bhfuil an Comóradh á reáchtáil in Phoenix i mbliana toisc gur é 2019 an comóradh 20 ^bliain ó tiomnaíodh Leacht Cuimhneacháin an Ghorta Mhóir ag an Irish Cultural Center.

Is deis í comóradh na bliana seo, ní amháin chun aitheantas a thabhairt d’obair an Irish Cultural Center and McClelland Library in Phoenix é féin ach onóir a thabhairt dóibh siúd a d’fhág Éire le linn an Ghorta é féin, na blianta eisimirce ina dhiaidh sin inar chuir go leor Éireannaigh an Ghorta agus a sliochtaigh go mór le hIarthar na Stát Aontaithe, agus an ról leanúnach atá ag diaspóra na hÉireann agus Gael-Mheiriceánaigh in Arizona agus ar fud Iarthar na Stát Aontaithe.”

Ba é seo an cúigiú uair a réachtáladh an Comóradh Idirnáisiúnta sna Stáit Aontaithe. Faoi 2019, bhí deich gcomóradh idirnáisiúnta ar an Ghorta Mhór go dtí seo. Ó reáchtáladh an chéad chomóradh idirnáisiúnta in Toronto agus Québec in 2009, reáchtáladh imeachtaí san Astráil, i gCeanada agus sa Ríocht Aontaithe chomh maith.